Simon Perathoner GLITCH & DATA
Giaurida: vënderdi, 21 de juni dala 20.30 Luegia: Lia Mostra d’Ert - Circolo, Plaza S. Antone 102, Urtijëi - Gherdëina (BZ) Dureda: 22 de juni nchin ai 21 de lugio 2019
N valgun studiëusc dla teoria dla comunicazion miena che la tecnologies nueves nfluenzeie nosta maniera de pensé, che deventon plu superfiziei y che saron manco usei a se fé pensieres plu soc. Ti ani ’70 ova Jean Baudrillard rujenà dla “cultura dla simulazion”, ma al didancuei sons bele sëura la simulazion ora davia che la ne se trata nia plu de raporc danter realteies paraleles che respidlea la realtà, ma nosta realtà vën acumpanieda dala realtà simuleda. La nvenzion y inovazion de chedri tecnics ne à nia mé mudà dassënn nosc raport cun la realtà, ma nce la maniera de ti jì permez al’ert vijiva. Tres la nteligënza artifiziela à i artisć y l’artistes n grumon de mesuns de esprescion nueves a desposizion per crië realteies nueves.
Cun chëstes tematiches se dà ju l artist “anormal” de Gherdëina Simon Perathoner. Mpede ziplé, coche la gran pert di artisć te Gherdëina, lëura ël cun tecnologies nueves d’al didancuei, codifican y transcodifican codesc de fotografies, mescedan codesc digitei, trasfurman hardware te opres d’ert y fajan “glitches”, chël uel dì che l mët ite fai tla secuënzes digiteles che muda pona i cuntenuc aldò de n stil persunel.
Simon Perathoner ie n fotograf che pënsa do dla fotografia nstëssa. A d’ël ti nteressea l mesun, l cunzet di codesc. Propi per chësta reflescion crieiel opres y nstalazions che n ne metëssa nia pra la prima udleda pra la fotografia.
Aldò de Vilélm Flusser fej l aparat da fotografé mé chël che l fotograf uel, ma l fotograf muessa ulëi chël che l aparat da fé fotos ie bon de fé. Nce sce l fotograf possa crì ora cie fotografé, muessel mpo se adaté ala funzion dl aparat. I culëures dla cuntreda che n vëija sun la fotos ne n’ie perdrët nia d’auter che cumposizions chimiches che l aparat da fotografé mescëida te na cërta maniera aldò de si programazion.
Simon Perathoner se dà propi ju cun chësc liam danter la tecnica y chël che n vëij. Pra la prima udleda semeiel che l mëina i spetadëures do la lum, ma pona i tolel pra la man y i mëina tres mpulsc a reflescions mpurtantes. A ti cialé al’opra "Ududa da Resciesa dl Saslonch da nëif ntan n di da surëdl d’inviern - Gherdëina" mienen p.ej. che l sibe na cuntreda da udëi, ma sun l cheder iel na lingia de zifres blances y fosces, l codesc biner – l‘essënza dla fotografia digitela. Per "Brain_Equivocation\Turin" à Perathoner fat 5047 fotos digiteles dla zità de Turin y se à mpensà de no les prejenté coche son usei dala fotografies. L ne n’ie nia la fotografies da udëi, ma la hardware sun chëla che la fotos ie unides salvedes. Chësta ie mé da udëi te n castl de scipa; l ne n’ie donca nia mesun ti jì permez. Dla fotos ne n’iel deguna stampes o copies, les ie mé tla forma de dates RAW sun na hardware dsareda ite.
Lijan i tituli dl’opres de Simon Perathoner vën l spetadëur sëura sun cërta nfurmazions y possa nscila se fé n pensier plu sot n con’ dl‘opres.
„Glitch & Data“ ie la prima mostra ndividuela de Simon Perathoner te Gherdëina. La mostra cureda da Camilla Martinelli vën giaurida n vënderdi ai 21 de juni dala 20.30 tla Lia Mostra d’Ert a Urtijëi y resta davierta cun na pitla pausa ti dis danter i 5 y 8 de lugio nchin ai 21 de lugio. Ai 9 de lugio vën la mostra giaurida mo n iede, n pert cun d’autri lëures. La mostra sarà davierta uni di dala 16 ala 19 y dala 20 ala 21.30. La ntreda ie debant.
Pra la giaurida ai 21 de juni fajerà Hannes Egger na ntroduzion speziela y performativa. L sarà da udëi na nterazion danter ël y n’opra che Simon Perathoner à fat aposta per la mostra. L se trata de n’adatazion dl videojuech cunesciù Super Mario World, te chëla che l artist à metù ite l’opres dla mostra, giaurian nscila n livel nuef dla digitalisazion.
Simon Perathoner ie nasciù tl 1984 a Persenon. L à fat la Scola d’Ert a Urtijëi y à pona studià Ert y Mesuns Nueves tl’Academia de Unieja y pona fotografia tl’Università de Viena. Tl 2013 àl giapà l IGAV Residency Award a Turin. L à fat pea pra truepa mostres coletives tla Talia y oradecà coche p.ej. “Bivacco”, San Servolo, Unieja (2019); “Biennale Gherdeina VI”, Museum Ladin, S. Martin de Tor (2018); “Black Box” 00A Gallery, Maran (2016); “Verbovisioni”, Magazzini del Sale, Unieja y “Speak Together”, Foyer - Kaiserliche Hofburg Dispruch. Austria, (2015); “Relations in Form - beyond the border”, Quartair, Den Haag, Paejes Basc (2014); “Mapping effekt - The Area of Bustle”, 12th International Festival of Contemporary Art, Ptuj, Slovenia (2014); “Landshape”, SpazioULTRA, Udin; “The Others”, ex jail “Le Nuove” Art-Fair, Turin, “ThisAge” Galleria A+A, Unieja (2013); “Antidepressiva 2”, “Clubschiff Johann Strauß”, Donaukanal, Viena; “Unreal Nature”, Hufak Offspace - Die Angewandte, Viena (2012); “BYOB” @ Internet Pavillion of the 54th Venice Biennale, San Servolo, Unieja; “Art Night – Venice”, Palazzo Grassi walls, Unieja (2011). L viv y lëura a Urtijëi.
Commentaires